Oè, cun “prendas de Sardigna” bos nche giughimus a Barùmini, a connòschere su “Palatu Zapata”, fatu fraigare da sos feudatàrios de Aragona in sos ùrtimos annos de su sèculu XVI.
Sa famìlia Zapata, arrivada in Sardigna in su 1323 cun s’Infante Alfonso, s’est istabilida in Casteddu, chi fiat una de sas Tzitades Reales e, in su 1541, est intrada in possessu de sa Baronia de Is Pratzas, Barùmini e Biddanoa Franca. Ant leadu su tìtulu de Sennores e, pustis, de barones, ant incomentzadu a l’amministrare burrende·nde su regime feudale.
Intre sos fàbricos chi formant custa residèntzia b’est unu palatu cun unu giardinu elegante, fraigadu intre sa fine de su sèculu XVI e sos primos annos de su sèculu XVII. Custu palatu est diventadu Sea Baronale e domo de su feudatàriu.
Bi sunt fintzas àteros duos fàbricos de sos primos annos de su Noighentos, impreados comente magasinos, istallas e domo de su massaju, chi nche daiant in una corte manna.
A dae in antis de su “Palatu Zapata” b’est sa crèsia de s’Immaculada, chèrfida dae sa famìlia aragonesa.
Oe sa residèntzia ispagnola est sa sea de su “Polo Museale Casa Zapata”, chi est partzidu in tres setziones: cussa archeològica (dedicada a su prof. Giuanne Lilliu), sa setzione istòricu-archivìstica e sa setzione etnogràfica.
Pro ite bos cussigiamus de visitare custu museu? Ca in s’ala prus antiga ais a camminare subra de unu nuraghe ca, in su 1990, cando su Comune de Barùmini bi fiat fatende unos cantos traballos, est essidu a pìgiu unu nuraghe e como, pro mèdiu de unu pamentu de bidru e de pontigras, podeis bìdere su nuraghe dae artu. Est una cosa ispantosa a nch’intrare in unu palatu nobiliare e a si nche agatare a dae in antis de unu nuraghe gasi mannu.
Pròpiu su prof. Lilliu aiat iscritu in antis de sos iscavos archeològicos, chi a curtzu de su “palatu de su Marchesu” sos antigos aiant fraigadu unu nuraghe e carchi pinneta. Unu nuraghe chi isse e totu at cramadu “Su Nuraxi ‘e crèsia”, ca est a curtzu a sa crèsia parrochiale.
In custa setzione sunt remunidos 180 repertos archeològicos chi sos archeòlogos ant àpidu in sos annos chimbanta in su “Su Nuraxi”.
[Informatziones e fotografia leadas dae su situ internet de sa “Fondazione Barumini”]
Prendas de Sardigna: Su Palatu Zapata in Barumini

Condividi
Articolo Precedente