Oe “Prendas de Sardigna” nos nche giughet a Su Burgu, a bisitare su Casteddu de su Gotzèanu chi est istadu fraigadu in su sèculu XII pro voluntade de su Giùighe Gunnari II de su Rennu de Torres, in una punta de granitu de su monte Rasu.
Cando azis a pigare fintzas a subra, azis a abbarrare ispantados ca, in custos logos antigos, in ue si contat de casteddos e de cavalieris, istòria e paristòria si ammesturant totu in giru a custa fortilesa, chi pro tempus meda est istada unu logu seguru, ca fiat amparada dae tres tzintas muràrias e ca est istada fraigada a 647 metres subra de su livellu de su mare e duncas non fiat fàtzile a l’acometare.
In custu casteddu si nch’est morta in su 1257 Adelàsia, s’ùrtima Giuighissa de su Rennu de Torres e in su 1478 s’est cuadu Artaldo de Alagon cun sos òmines suos, in antis de pèrdere sa batalla de Macumere contra a sos Aragonesos.
Pro ite bos cussigiamus de lu bisitare? Ca est unu de sos casteddos prus bene tentos de Sardigna; ca mancari fiat una fortilesa militare b’ant abitadu pessonàgios importantes de s’istòria sarda, intre custos mentovamus a Gonario II de Torres, Adelàsia de Torres e Marianu IV de Arbarèe, su babbu de Lianora d’Arbarèe, chi fiat su Giùighe chi at fundadu fintzas sa bidda de Su Burgu; ca sa vista dae cue subra est ispantosa in totu sas isajones de s’annu.
