Oe, chi dae su 1999 est sa Die Internatzionale de sa Limba Materna, cun “prendas de Sardigna” bos faeddamus de comente est nàschida custa die e de una initziativa de importu mannu ammaniada dae sa Corona de Logu.
Custa die l’at seberada s’ONU pro ammentare su 21 frèargiu
de su 1952, cando sas fortzas de s’òrdine pakistanas
ant mortu medas istudiantes de s’Universidade
de Dacca chi fiant manifestende pro su
reconnoschimentu de su bengalesu, sa limba issoro, comente limba ufitziale de su Pakistan.
In ocasione de custa die, chi tzèlebrat sas limbas minorizadas de totu su mundu, sa Corona de Logu, organizatzione de sos amministradores locales indipendentistas sardos, chi dat cara a sa promotzione de sa limba sarda e a s’impreu suo in sas istitutziones, at ammaniadu medas initziativas pro sos sòtzios suos e pro sos tzitadinos sardos.
Sos sòtzios de s’organizatzione sunt invitados a adotare in su Consìgiu Comunale una motzione pro sa promotzione de su bilinguismu e pro s’impreu de su sardu in cada Comuna.
A motzione aprovada:
1) su Presidente de su Consìgiu Comunale s’impinnat a abèrrere, in sardu, cada setziada;
2) sa Giunta Comunale s’impinnat, cun su mèdiu chi cunsiderat prus oportunu (cunventzione cun sas Universidades, ativatzione de Isportellos Linguìsticos, àteru), a publicare in s’albu pretòriu istitutzionale sas delìberas de sa Giunta e de su Consìgiu in limba sarda e in limba italiana;
3) sos traballadores de sa Comuna s’impinnant a faeddare in sardu cun sos tzitadinos e cun sos collegas de s’ente locale.
Pro como, sa Corona de Logu at presentadu sa motzione in sos Consìgios comunales de Àrthana, Bauladu, Bòrore, Gàiru, Macumere, Mamujada, Mòguru, Aristanis, Pabillonis, Patada, Pirri,Piaghe, Ruinas, Samugheo, Arresi, Santu Lussùrgiu, Serrenti, Silanos, Simaba, Simaxis, Terraba, Tula, Ussaramanna e Biddanoa de Forru.
Pro su chi pertocat sas initziativas pro totus sos sardos, sa Corona de Logu at promòvidu unu vìdeu promotzionale cuncordadu cun s’Assòtziu Culturale Babel.
Sa punna de su vìdeu est de trasmìtere sa cussèntzia de su sardu che a limba “normale”, chi si potzat impreare in cada traballu, atividade e momentu de sa vida de cada die, invitende totus sos sardos a impreare sa limba issoro prus chi podent, ca unu pòpulu sena limba, o peus, unu pòpulu chi si privat de sa limba sua, est destinadu a nche pèrdere raighinas e identidade.
Pro abbaidare su vìdeu incarca custu ligàmene: https://www.facebook.com/coronadelogu/posts/841602536423084?notif_id=1613740689650869¬if_t=page_post_reaction&ref=notif
