A pustis de unos cantos meses de pasu, semus torrados cun sa rubrica “Prendas de Sardigna” e, dae oe, bos isetamus ogni domìniga a sas deghe de mangianu.
Oe bos presentamus sas domus de janas de s’Elefante, in Casteddu Sardu. In custa roca, un’elefante de trachite picadu dae bentos e àteros agentes atmosfèricos, bi sunt duas domus de janas, istuvacadas in su neolìticu finale (3200 – 2800 in antis de Cristos) in duos livellos diferentes.
In sa tumba II oe s’agantat petzi duas càmeras ma podet èssere chi, a dae in antis de custas càmeras, bi fiat unu padiglione e a pustis nde siat falada sa bòveda. Forsis nd’est falada in tempos antigos e, pro custu, in sa matessi roca ant istuvacadu una tumba noa.
In su 1914, s’istudiosu Edoardo Benetti est istadu su primu a collegare a un’elefante sa forma de sa roca, chi fintzas a tando fiat connota comente “sa pedra pertunta” (la pietra traforata).
Benetti naraiat: «chi da Castelsardo percorre la via Nazionale che conduce a Sedini, d’un tratto si trova di fronte ad uno strano spettacolo. Un gigantesco elefante, tre volte più alto degli enormi mamhut preistorici, par che esca dalla giungla e s’incammini verso la montagna.»
A bisu nostru, però, in dies de oe, in custas domus de janas, pro resones de seguresa, non si bi podet rùpere e sa gente podet petzì tirare carchi fotografia dae foras. Pro ite est importante custa roca? Ca est in un àrea archeològica de importu, cunsideradu chi a curtzu b’est fintzas su nuraghe Paddaggiu e una muraglia megalìtica; ca in sas domus bi sunt sos corros de su trau, picados in una pinna de muru e ca est a oru de s’istrada e a bi lòmpere est simple meda.
Finimus custu articuleddu cun s’ispera chi sos entes cuntivigent de prus custu situ, ca est una làstima manna a lu bìdere gasi ca, sende chi nch’est a curtzu de Casteddu Sardu, gente meda andat a lu visitare.
Fotografia leada dae http://e-borghi.com/
