In Casteddu, in su bighinadu de Villanova, in pratza Santu Gòsomo, b’est sa Basìlica de Santu Sadurru, sa crèsia prus antiga de sa tzitade, chi est dedicada a su Patronu.
Sa crèsia e sa necròpoli, chi nche lompet fintzas a sa crèsia de Santu Lutzìferu, est unu de sos cumplessos paleocristianos prus antigos de s’Ìsula.
Dae su mese de Nadale de su 2014 est gestidu dae su MiBACT pro mèdiu de sa Diretzione regionale de sos museos.
Su primu a mentovare custa crèsia est istadu su diàconu Ferrando, biògrafu de santu Fulgèntziu de Ruspe, chi at bìvidu duas bias, intre su 507 e su 523, in su monastèriu chi aiat fundadu isse matessi.
Sa crèsia chi at agatadu Fulgènziu est in su logu in ue bi fiat su sepulcru de Sadurru, chi est mortu màrtire in su 304, pro voluntade de Diocletzianu.
In su 1089 su cumplessu est istadu donadu dae su Giùighe Gantine Salùsiu II a sos padres benedetinos de s’abadia de Santu Vitore de Marsìglia, chi b’ant fatu unu prioradu. Sos Vitorinos ant restauradu sa crèsia in istile romànicu-proventzale, e sa basìlica noa est istada cunsacrada in su 1119.
Pro ite bos cussigiamus de visitare custa crèsia? Ca ais a atraessare dae su comintzu, sas tapas de s’istòria religiosa de Casteddu, gràtzias a sa figura de su patronu màrtire suo, Sadurru e a su primu fàbricu cristianu de sa tzitade; ca custu monumentu est a curtzu a sa Basìlica de Nostra Segnora de Bonària e a su campusantu monumentale.
Fotografia de : A. Saba, leada dae su situ sardegnaturismo.it
